‎جعل السحاب الي تزبر له شوي
‎ يسقي مرابيع الوليف ودياره
‎وينبت بها من كل عودن ويحيي
‎. واسوق ذودي صوبهم بالبشاره
‎والقى عذر باروح يمه وباجي
‎. في ليله وصبحه وتالي نهاره
‎وتتخالط ابلي وابل ابوها على الي
‎تشرب وتصدر للزهر والزباره
‎واشوف زوله واسمعه يوم يحكي
‎واشوف خاتم كفها والسواره
‎مايدري ان قدره ورى الضلع مبني
‎والشوق في صدري تقادح شراره
‎ياكيف اوضح له والمح له بشي
‎واصارحه بالصدق واسمع قراره
‎ياهل الهوى تكفون فزعاتكم لي
‎ان كان تنفع في القضيه شطاره
‎الحي مذخوراً لجل خدمة الحي
‎والجود في وقت الطواري نعاره
‎حالي نحل من شافني قال مبلي
‎من عشقته ماذقت غير المراره
‎واعطوه وصف لحالتي اليوم وش هي
‎يمكن يقدر في الهوى قلب جاره
‎وان صد عني لاتقولون لي شي
‎خلو الغشيم يشوف باقي مساره
‎غبو الخبر ماعاد لي قلب مقوي
‎باعرف على طول المدى بالخساره
‎وياعين هلي دمع فرقاه وابكي
‎ورشي على صدري وطفي الحراره
‎اما تطيب النفس والا تعيي
‎والا يذوق الصدر طعم احتضاره