التسجيل التعليمـــات قائمة الأعضاء التقويم اجعل كافة الأقسام مقروءة
  رقم المشاركة : ( 1 )  
قديم 28 Oct 2010, 04:24 AM
الصورة الرمزية جهاد عبدالله
 

 الأوسمة و الجوائز
آخر تواجد للعضو
 بيانات الاتصال بالعضو
 اخر مواضيع العضو
  جهاد عبدالله غير متواجد حالياً  
الملف الشخصي
رقــم العضويـــة : 9515
تـاريخ التسجيـل : Sep 2010
المشاركـــــــات : 21 [+]
عدد الـــنقــــــاط : 10
قوة التـرشيــــح : جهاد عبدالله صاعد
الصبيحي ورحله مجانيه للرياض والبركه بك ياهلال عدد المشاهدات 393 / عدد الردود 0

الصبيحي يتمتع بسفره مجانية الى الرياض .....بركاتك ياهلال ...!!!

--------------------------------------------------------------------------------


يوم الأربعاء الماضي كنت ابي اسافرالرياض لزيارة بعض الأقارب ولكن
الله ماكتب لي لأني ماحصلت مقعد في الطائرة حيث كان حجزي إنتظار ...
وعدت مع ليموزين الى المنزل



ونحن في الطريق قال لي السائق (وهو بالمناسبة سعودي وكبير في السن ويدعى أبو ناصر )
ليه ماتسافر مع الباصات المجانية للرياض ..!!
قلت: باصات مجانية ....!!!
قال :إيه وبعد يعطونك وجبات ومشروبات ولاتدفع ريال واحد
قلت :شكلك تمزح وشلون تاكل وتشرب وتسافر بلاش...! ماصارت هذي
قال :ياالصبيحي أنت ماتشوف تلفزيون ....! ماتقرأ جرايد ...! الباصات هذي تنقل الشباب للرياض عشان المعركة ...!
عاد والله خفت وجاتني النفاضه وقلت لأبو ناصر : أي معركه يارجال تعوذ من إبليس
قال :المعركه الكبرى مع إيران اليوم
قلت : افاااااا إيران .....!! والله كنت اتوقع الحرب معاهم من زمان
عاد أنا تحمست وقمت أتخيل نفسي في المعركه ومعي بازوكه وقنبله يعني (رامبو على غفلة)
وقلت :طيب وأي واحد يقدر يروح معاهم
قال إيه بس تكون معاك بطاقة الأحوال...
قلت اجل الله لايهينك ودني البيت عندي مسدس اباخذه معي للحرب ...والله ثم والله لأاوريك في هاالفرس
قال اي مسدس واي خرابيط شكلك تبي تودينا في داهيه .....أنا قصدي مباراة الهلال في البطولة الأسيوية ...!!!
قلت :افا طلعت السالفة كورة وهلال وأسيوية .....طيب وشهوله الباصات والوجبات المجانية
قال :الحكومة الله يخليها لنا وفرت كل شيء عشان الهلال... ومثلك عارف هذا (نادي القرن) مو أي نادي
قلت: نادي القرن ......!! وأنت ياشايب وشدراك أنه نادي القرن
قال : دايم اشوفهم في القناة الرياضية يقولون لعب نادي القرن وفاز نادي القرن ونام نادي القرن وسافر نادي القرن
حتى انهم مسوين حفله كبيره في لندن وفيها بنات وشراب وفله ...
قلت: فل الله راسك .... كل الي في القناة هلاليين من الرئيس الى الفراش ومايمدح السوق الا من ربح فيه
قال :غريبه بس حتى الجرايد تقول (الهلال نادي القرن )
قلت سعيد أخو مبارك كلهم بعد هلاليه والي مو هلالي لازم يكون مع الشلة عشان يترزق الله
لكن خذ جوالي وعطني رأيك بعد المباراه في نادي القرن ....!

المهم وصلنا مكان الباصات ونزلني عندها وراح .....
وحصلت ناس كثير وجاني هندي وقال إنته يبي روه رياض قلت إيه قال هات بطاقة
وأعطيته البطاقة وركبني الباص



وجلست في مقعد وحولي شباب جالسين في الباص الي نايم والي متلطم بالشماغ والي قاعد يلعب بالجوال
عاد أنا مسوي فيها هلالي صميم وقلت أبغير الجو شوي وقمت أصفق واقول (ياهلال عزك عزنا.... ياهلال)....!!
بس تفاجأت إن الشباب ماتفاعلو معي وقامو يطالعوني بنظرات إستخفاف ...!!!
قلت شكل الأغنية هذي قديمه لازم اجيب شي جديد
قلتيامنيتي ياسنا خاطري وأنا أحبك ياهلال ....) ..!!
بس المفاجأه إن الربع ولاعلى بالهم وحسيت إن البعض صار يطالعوني بنظرات غاضبه ...
وبصراحه ارتفع ضغطي
هذي جزاتي الحين .... ابي اسوي حماس لكم في الباص
والله لأاوريكم فقمت اصيح بصوت عالي
(ياسر وينه) ....... وفجأه صاحو الشباب كلهم ......(في الإستراحه) ......!!!
بصراحه إنصدمت منهم وسألت الي جالسين جنبي قلت الإخوان هلاليه
قال واحد فيهم : أي هلاليه وأي بطيخ حنا شباب عاطلين وفيه وظائف في الرياض نبي نقدم عليها وسمعنا أن فيه باص مجاني
يوصلنا للرياض قلنا نركب فيه منها نقدم في الوظيفة ومنها نتسلى بالمباراه
قلت : الله يسهل امركم إن شاء الله وتحصلون وظيفة زينه ...
وسألت شاب آخر : وأنت باين عليك متعصب هلالي وجاي خصيصا عشان المباراه ...!
قال : لاوالله أنا مسيكين وفقير وابوي منوم في التخصصي بالرياض ولاعندي فلوس حق الطريق قلت أستغل الفرصه وأركب مع هالباص المجاني
قلت للشاب : الله يقوم الوالد بالسلامة ويكثر لنا من هالبطولة الأسيوية وليتك كل يوم تلعب ياهلال ....!!!
المهم وصلنا بالسلامه للملعب ونطب في هالزحمه والعالم متجمعين والطوابير طويلة
وفجأه وواحد من هالجمهور يسلم علي بس ماعرفته قلت :مين الأخ
قال :ماعرفتني أنا زميلك في الدراسة (محمد)
قلت : هلا والله محمد كيفك اخبارك ... بس غريبه خابرك نصراوي وش الي جايبك اليوم
قال :والله جاي اشوف مفاجأة سامي الجابر الي محضرها للفريق الإيراني عاد تعرف هالاعب يحب المفاجأت
قلت :وهل يخفى القمر.... وهل تخفى مفاجأته لنا في 2002 عندما سنتر تسع مراات.....!!
قال :الله يقطع سواليفك يالصبيحي ياله دخلنا الملعب
المهم دخلنا الملعب وجلسنا وبديت اسأل الجمهور الي حولي
ها وش توقعاتكم شباب
عاد كل واحد يفتي من راسه الي يقول اثنين صفر.. والي يقول ثلاثه واحد... والي يقول هاتريك القحطاني.. وخذ من هالتوقعات
قلت لهم :ياخوفي تكون مثل (أم صلال )العام الماضي
قالو: لا ياحبيبي هذا عهد جيرتس المدرب الاوربي الكبير
قلت: بس هو خلاص رايح المغرب ولاعاد يبي يدرب الهلال
قالو لا ...قرينا في صحيفة الجزيرة والرياض تصريح للأمير عبدالرحمن بن مساعد إن جيرتس باقي مع الهلال لآخر الموسم
قلت ايه اجل الجزيرة والرياض .....!!! لا والله ونعم الصحف ونعم المصدر
المهم بدت المباراه وأشوف الفريق الإيراني ولاعلى باله ...
لاإرتباك من الجمهور.... ولا تحفظ دفاعي ...
وتمريرات حلوه وتسديد ولاأروع ولعب وفن وتكتيك عال العال
وممثلنا الهلال ماحولك أحد....(ياسر والفريدي)متبطحين في منطقة الجزاء يبون بلنتي
(والزوري والمرشدي وهوساوي) لاعب في حسبتهم رقم تسعه
اشي كباري واشي تسحيب واشي تسديد
وانتهى الشوط الأول ولاتشوف إلا غبار (عبدالرحمن بن مساعد) طالع من الملعب
وكنه يقول ربعي أعرفهم زين من أيام أم صلال وهذا سيفوه وهذي خلاجينه
ويصفر الحكم الشوط الثاني ...ولا تغير شي بل المصيبة الفريق الإيراني مسجل قول ...!!!
بصراحة الجمهور إنصدم وحصل إغمائات كثير ...وصرت شغال مسعف أشل هذا ..وهف على هذا ..وأمسح دموع هذا ...
وصار أغلب الجمهور يبكي ويقول:
وين كلام (خلف ملفي وصالح الحمادي وسلمان العنقري) في القناة الرياضية ...!!
وين وعد الرئيس لنا وعلى خشمي وأبشرو بالعالمية ....!
وين مفاجأة سامي الجابر.....!
وين كلام ياسر وقتاله لأخر دقيقه حتى ولو لعب برجل وحده ...!!!
وين (رادوي) والي يموووووت في لغاليغ الهلال ولايهمه الخمسه والأربعين مليون الي شفطها ..!!
وين (ويلي) ابو خمسه وسبعين مليون ريال ....!!
وين (نيفيز) والخمسه والثلاثين مليون ريال والي كل يومين يسافر للبرازيل يطمن عليها ..!!
وين (المحياني) الي جلس ليله وهو يستخير الله في ال 15 مليون ريال ...!!
وين (هوساوي) الي قيمته بعشرين مليون ريال ..!!!
وين اللاعب( الكوري) الي حاسد زملائه على الملايين ولاكفاه العشره مليون ريال الي بلعها وقام يطلع القهر في اللاعب الإيراني...!!!
ياخسارة الملايين الي راحت....كان فيه ناس أولى فيها (فقراء وأيتام وأرامل ومرضى ومديونين)
لكن المال السايب يعلم السرقة ....!! والله مايطق بعصا
عاد وأنا طالع من الملعب جاتني رساله على جوالي من سواق التاكسي أبو ناصر وكاتب فيها (أمحق قرن)



Digg this Post!Add Post to del.icio.usBookmark Post in TechnoratiTweet this Post!
رد مع اقتباس
إضافة ردإنشاء موضوع جديد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



Powered by vBulletin® 2011
كل مايطرح بالملتقى لا يعبر عن رأي الإدارة وإنما يعبر عن رأي كاتبه