بسم الله الرحمن الرحيم
السلام عليكم ورحمة الله وبركاته
الحب مثل النوم والوصل الاحلام
والشين من الاحلام صد المحبين
نوم’ن’طويل’ن’عمره اشهور واعوام
وان قمت ففهمها فراق وسهر عين
وانا رقدت وعمري اربع عشر عام
وصحيت في شهر اربعه عام الالفين
نوم’ن’ثقيل’ن’كله احلام واوهام
ونصيبي من الاحلام الجانب الشين
صحّى الفراق اقلوب في عكسه نيام
وغاب الفرح وانا بعكسه الى الحين
يا حزن كبدي حزن من ضاق ثم حام
اخذت فروخه ما درى ليه ولوين
بعد ما شاف العش عيدان وعظام
خالي تفكر فوق ويسار ويمين
خلا عشاها فيه ومن الوطى شام
زبن على روحه وفل الجناحين
وياوجد حالي وجدمن نام ثم قام
على صياح امه وهو دون رجلين
عويق وامه تنعته والنعت سام
وهو خابر انه يقسم الصف صفين
حبا وصاح بصيحة تاصل الشام
منها تقطع في خفوقه شرايين
على وليف’ن’ قسم اظنوني اقسام
واقفى وانا ما اعرف طرد المقفين
راح وترك في صدري ووسوم واعلام
وصى علي طيفه وقفى بقلبين
ليته تعذر كان ماهو بملام
بعد ما شاف الدرب بيسير دربين
اشوى عليه شوي من عظ الابهام
واشوى علي شوي من دمعه البين
تمشي بنا الاقدام والموت قدام
وميعادنا يا مفرق اثنين بعدين
يا عين لا تبكين وعيونه تنام
عادش الى ما خاب ظني بترضين
لو الدموع اتفيد فادن الايتام
ولو الكلام ايفيد عادت فلسطين
ولو النبات يطلعه دمعة هيام
شفتوا على وجهي ورود وبساتين
الحب سجن وبعد الاحباب الاعدام
وقلوبنا سجّان مدري مساجين
الحب نوم’ن’عمره اشهور واعوام
وان قمت ففهمها فراق وسهر عين
وانا تراي انعست من مده ايام
لا احد’ن’ يصحيني يا الاقدار تكفين
للشاعر محمد بن فطيس